Shtetet e Bashkuara e kanë vendosur ta shpallin përsëri organizatë terroriste grupin rebel jemenas, Huthi, i cili mbështetet nga Irani.
“Të mbështetur nga Forca Qud e Korpusit të Gardës Revolucionare Islamike të Iranit (IRGC-QF), e cila armatos dhe stërvit organizatat terroriste në mbarë botën, rebelët huthi kanë shtënë ndaj luftanijeve të marinës amerikane dhjetëra herë prej vitit 2023, duke i vënë në rrezik gratë dhe burrat amerikanë në uniformë”, tha Shtëpia e Bardhë në një komunikatë më 22 janar.
Në komunikatë, ajo iu drejtuar Huthit si Ansar Allah, që është emri i përdorur nga grupi ekstremist, i cili ka luftuar që nga vitet e ’90-ta kundër qeverisë jemenase të njohur ndërkombëtarisht.
Vendimi i administratës së presidentit Donald Trump nis një proces që me gjasë do të përfundojë brenda 45 ditëve për ta shpallur edhe zyrtarisht Huthin si organizatë terroriste në bazë të legjislacionit amerikan.
Gjatë mandatit të tij të parë, Trump e kishte shpallur Huthin si organizatë të huaj terroriste, por ai vendim u shfuqizua nga administrata Biden për shkak të shqetësimeve se një gjë e tillë mund të pengonte dërgimin e ndihmave të domosdoshme në Jemen.
Presidenti Joe Biden më pas e shpalli Huthin entitet të posaçëm terrorist global, që është sanksionim i një shkalle më të ulët.
Veprimi i fundit, një nga të parat e Trumpit në mandatin e tij të dytë në fushën e marrëdhënieve të jashtme, mund të jetë hap fillestar në fushatën e “presionit maksimal” që ekipi i tij ka premtuar të ripërtërijë kundër Iranit, të cilin e fajëson për mbështetjen e aktiviteteve ekstremiste në Lindjen e Mesme.
Më 2014, rebelët huthi e morën kontrollin në pjesën më të madhe të veriut të Jemenit dhe kryeqytetin e tij, Sana, duke çuar në një luftë që ka vrarë dhjetëra mijëra njerëz dhe ka krijuar një katastrofë humanitare në vendin më të varfër të botës arabe.
“Që nga marrja në kontroll me forcë i shumicës së qendrave të popullsisë së Jemenit nga qeveria legjitime e Jemenit në vitet 2014-2015, rebelët huthi kanë kryer sulme të shumta ndaj infrastrukturës civile, duke përfshirë sulme të shumta ndaj aeroporteve civile në Arabinë Saudite, sulmet vdekjeprurëse të janarit 2022 në Emiratet e Bashkuara Arabe dhe më shumë se 300 raketa të lëshuara ndaj Izraelit që nga tetori 2023” thuhet në komunikatën e Shtëpisë së Bardhë.
Shtëpia e Bardhë shtoi se aktivitetet e grupit rebel “rrezikojnë sigurinë e civilëve dhe personelit amerikan në Lindjen e Mesme, sigurinë e partnerëve tanë më të afërt rajonalë dhe stabilitetin e tregtisë detare globale”.
Rebelët huthi i shtuan sulmet ndaj transportit në rajonin e Gjirit dhe hodhën raketa drejt Izraelit, duke thënë e po e bënin këtë në mbështetje të lëvizjes Hamas të Gazës, e cila gjithashtu është shpallur organizatë terroriste nga Shtetet e Bashkuara dhe Bashkimi Evropian.
Veprimet e tyre nxitën sulme ajrore nga ushtritë e SHBA-së dhe Izraelit, por rebelët kohët e fundit duket se janë tërhequr nga sulmet e tyre pas arritjes së armëpushimit në Gazë./REL
