Shtetet e Bashkuara i kanë bërë sërish thirrje Britanisë të shqyrtojë vendimin për t’i lejuar kompanisë kineze, Huawei rol të kufizuar në rrjetin 5G.
“Ekziston mundësia që Mbretëria e Bashkuar të rishikojë zbatimin e këtij vendimi. Ne do të sigurohemi që kur të mbartet informacioni amerikan nëpër rrjete, ne të na garantohet se rrjeti është i besueshëm. Ne do të punojmë me Mbretërinë e Bashkuar. Ne u kemi bërë atyre thirrje që të marrin vendim tjetër nga ai që kanë marrë dhe do të bisedojmë se si të veprojmë”, u ka thënë Pompeo gazetarëve.
Pompeo pritet të arrijë sot në Londër ku do të takohet me homologun e tij britanik, Dominic Raab, si dhe kryeministrin e Britanisë, Boris Johnson.
Kujtojmë se qeveria amerikane ka shtuar në listën e zezë kompaninë kineze, Huawei vitin e kaluar, duke ndaluar shitjet e produkteve të kësaj kompanie në territorin e Shteteve të Bashkuara, me arsyetimin se përbën rrezik për sigurinë kombëtare.
Nga ana tjetër qeveria e Britanisë së Madhe vendosi dje që të vijojë bashkëpunimin me Huawei për ndërtimin e rrjetit 5G, por me disa kufizime.
Kompanisë Kineze i ndalohet furnizimi me pjesë sensitive të pajisjeve të rrjetit, të njohura si bërthama dhe do të lejohet të mbajë përgjegjësi vetëm për 35% të programit 5G në periferi të tij, në të cilin përfshihen pajisjet radiofonike. Gjithashtu, do të jetë plotësisht i përjashtuar nga zonat përreth bazave ushtarake dhe impianteve bërthamore./Opinion.al
