Administrata Biden po inkurajon privatisht liderët ukrainas që të sinjalizojnë publikisht një hapje për të negociuar me Rusinë dhe të mos deklarojnë më se ata refuzojnë të marrin pjesë në bisedimet e paqes me Presidentin Vladimir Putin në pushtet.
Lajmin e bënë të ditur burime të informuara për Washington Post.
Kërkesa e zyrtarëve amerikanë nuk synon të shtyjë Ukrainën në tryezën e bisedimeve, siç kanë saktësuar burimet që e kanë cilësuar këtë veprim si një përpjekje për të siguruar që qeveria e Kievit të mbajë mbështetjen e vendeve që nuk duan të vazhdojë lufta për një kohë të gjate.
Burime thonë për Washington Post se zyrtarët amerikanë ndajnë vlerësimin e homologëve të tyre ukrainas se Putin nuk është serioz për negociatat e paqes për momentin. Megjithatë, ata besojnë se vetoja e Zelenskit ndaj liderit të Kremlinit ka krijuar shqetësim në pjesë të Evropës, Afrikës dhe Amerikës Latine, ku efektet e luftës në aspektin e kostos së jetesës dhe mungesës së ushqimit ndihen më qartë.
“Vështirësitë e shkaktuara nga konflikti në Ukrainë janë një çështje shumë reale për disa nga partnerët tanë”, tha një nga zyrtarët amerikanë./Opinion.al
