“Shqipëra e Ballkani perëndimor janë të shqetësuar për një kërcënim të ri. Kërcënimi i mundshëm i luftëtarëve të huaj që kalojnë tranzit si refugjatë, që largohen nga Siria, Iraku dhe Afganistani”. Kështu deklaroi ambasadori amerikan, Donald Lu, i cili ishte i pranishëm në konferencën kundër ekstremizmit të dhunshëm të organizuar sot në Durrës.
Ndërkaq ai foli edhe për një listë terroristësh që SHBA-të i kanë vënë në dispozicion Ministrisë së Brendshme.
“Për të parandaluar këtë Shqipëria ka akses në database e FBI-së përmes një marrëveshjeje të nënshkruar gjatë vizitës së kryeministrit Rama në prill. Me këtë mjet policia kufitare shqiptare mund të hyjë në listën e mijëra terroristëve potencialë që është hartuar me dhjetra vende partnere”, tha Lu.
Ambasadori nënvizoi mbështetjen që SHBA do të vijojë të japë në këtë çështje sepse sipas tij, ISIS nuk është vetëm në Siri dhe Irak, nuk është vetëm një ushtri, është ideologji dhe për këtë arsye përbën një kërcënim serioz për Europën e më tej. “Ne nuk e dimë në çfarë forme do të materializone këto kërcënime, siç ndodhi këtë vit në Francë e Belgjikë e Gjermani. Por dimë një gjë: Ngado që këto kërcënime vijnë ne jemi besimplotë se nëse punojmë së bashku do jemi gati ti përballojmë”, vijoi ai.
