Shtetet e Bashkuara po përgatisin tarifa mbi eksportet franceze, në vlerë prej 2.4 miliardë dollarësh, si hakmarrje për taksat që Franca u ka vënë shërbimeve digjitale.
Përfaqësuesi i Tregtisë Amerikane, Robert Lighthizer, tha se taksat që Franca ka miratuar në korrik, godasin padrejtësisht gjigantët amerikanë të teknologjisë.
Sipas tij, tarifat e mundshme kundër Francës kanë për qëllim të pengojnë vendet e tjera të ndërmarrin hapa të ngjashëm, ndërsa artikujt që mund të përballen me tarifa deri në 100%, janë: djathi, vera, dhe çantat.
Ndërkaq, Franca i mbron taksat e veta, duke thënë se ato duhet të bazohen në aktivitetin digjital dhe jo vetëm atje ku firmat kanë selitë e tyre.
Me taksën e re në Francë, çdo kompani digjitale me të ardhura prej më shumë se 750 milionë eurosh , prej të cilave së paku 25 milionë gjenerojnë në Francë, është subjekt i tatimit.
Nga ana e tyre, kompanitë amerikane të teknologjisë thonë se ligjet e tilla i detyrojnë ato të paguajnë taksë të dyfishtë./Opinion.al
