Sekretari amerikan i Shtetit, Mike Pompeo dhe sekretari i Mbrojtjes në detyrë, Patrick Shanahan, thanë në Kongres se objektivi i tyre gjatë ditëve të fundit ka qenë të dekurajojnë Iranin, pasi sipas tyre administrata e presidentit Trump kërkon të parandalojë përshkallëzimin e mëtejshëm të situatës.
“Kjo ka të bëjë me parandalimin, jo me luftën, nuk kemi për të shkuar në luftë. Fokusi ynë kryesor në këtë pikë është parandalimi i gabimeve të Iranit. Ne nuk duam që situata të përshkallëzohet”, tha Shanahan.
Marrëdhëniet midis Teheranit dhe Uashingtonit janë përshkallëzuar që nga viti i kaluar kur presidenti i SHBA-së, Donald Trump tërhoqi Uashingtonin nga një marrëveshje e rëndësishme mes Iranit dhe fuqive botërore, e cila frenoi programin bërthamor të Teheranit në këmbim të lehtësimit nga sanksionet ekonomike.
Prej atëherë, Uashingtoni ka rritur retorikën e ndaj Teheranit si dhe ka rivendosur sanksione ekonomike, ndërsa ekzistojnë shqetësime në rritje për një konflikt të mundshëm ushtarak pasi SHBA përforcoi praninë ushtarake në Lindjen e Mesme dhe Gjirin Persik, duke shtuar se ekzistojnë “kërcënime ” nga Irani.
Teherani ka hedhur poshtë akuzat e SHBA-së, ndërsa të dyja palët kanë thënë se nuk duan luftë./Opinion.al
