SHBA pritet të caktojë Gardën Revolucionare elitare të Iranit, si një organizatë terroriste e huaj, duke shënuar kështu herën e parë në histori që Uashingtoni ka etiketuar zyrtarisht një ushtri si grup terrorist.
Sipas Reuters, tre zyrtarë të lartë amerikanë pohuan vendimin, i cili sipas tyre pritet të njoftohet nga Departamenti i Shtetit i SHBA. Nga ana tjetër Pentagoni nuk pranoi të flasë për çështjen dhe i referoi pyetjet Departamentit të Shtetit, i cili gjithashtu refuzoi të komentojë.
Thuhet se njoftimi do të shpallet para përvjetorit të parë të vendimit të Presidentit Donald Trump për t’u tërhequr nga një marrëveshje bërthamore e vitit 2015 me Teheranin dhe për të vendosur sanksionet që kishin dëmtuar ekonominë e Iranit.
Administrata Trump është fokusuar prej kohësh tek IRGC dhe marrja në shënjestër e këtij entiteti të rrezikshëm, por ky vendim diskutohet prej vitesh.
Në vitin 2007, ishte Thesari i Shteteve të Bashkuara ai që caktoi forcën Quds të IRGC-së, njësinë e saj përgjegjëse për operacionet jashtë vendit, “për mbështetjen e saj ndaj terrorizmit” dhe e përshkroi atë si “krahun kryesor të Iranit për zbatimin e politikës së saj për mbështetjen e grupeve terroriste dhe kryengritëse”.
Që nga themelimi i saj në vitin 1979, IRGC ka luajtur një rol aktiv në masat shtypëse kundër gjithë protestave e kryengritjeve që kanë ndodhur gjatë 40 viteve të shkuara, si dhe në zgjerimin e ndikimit malinj të mullahëve në Lindjen e Mesme përmes grupeve terroriste proksi.
Etiketimi zyrtar si FTO (organizatë e huaj terroriste) do ta lejojë SHBA-në të marrë masa praktike kundër këtij entiteti, së bashku me kompanitë dhe individët e lidhur me të./Opinion.al
