Administrata amerikane po shqyrton ndalimin e kompanisë “Huawei” nga sistemi financiar i SHBA-së, duke e bërë praktikisht të pamundur që të kryejë transaksione në dollarë amerikanë. Kjo vjen si pjesë e një sërë masash që po planifikohen të ndërmerren ndaj gjigantit kinez, thotë Reuters duke cituar disa burime të afërta me këtë çështje.
Zyrtarët e administratës amerikane hartuan një memorandum dhe mbajtën takime ndër-institucionale për këtë çështje ndërsa plani është shqyrtuar nga Këshilli për Siguri Kombëtare i Shtëpisë së Bardhë.
Kujtojmë se kjo kompani tashmë përballet me disa sanksione të SHBA-së, pasi sipas autoriteteve amerikane përbën rrezik për sigurinë kombëtare.
Qeveria e SHBA-së ka ngritur kallëzime penale kundër Huaweit, duke pretenduar vjedhjen e sekreteve tregtare, mashtrim bankar, shkelje të sanksioneve të SHBA-së kundër Iranit, dhe po përpiqet të bindë vendet aleate për ta ndaluar atë.
“Kërcënimi për të pasur sisteme kineze të telekomunikacionit brenda rrjeteve amerikane, ose brenda rrjeteve në të gjithë botën, paraqet një rrezik të madh, një rrezik të sigurisë kombëtare”, ka deklaruar më 20 gusht, sekretari amerikan i Shtetit, Mike Pompeo./Opinion.al
