Sekretari amerikan i Mbrojtjes, Mark Esper ka konfirmuar se forca të reja amerikane do të dërgohen në lindje të Sirisë për të mbrojtur vendet ku ka naftë, nga militantët e Shtetit Islamik (IS), dhe gjithashtu ka shtuar se në Siri do të dërgohen edhe automjete të blinduara dhe ndoshta edhe tanke. Komentet e Esper sugjerojnë se disa qindra trupa pritet të dërgohen në rajon.
Ky mision do të realizohet pavarësisht se rreth 1 mijë trupa amerikane po tërhiqen nga misioni i tyre në afërsi të kufirit me Turqinë, ku trupat nga Turqia dhe Rusia janë duke kryer patrullime të përbashkëta në zonat që më herët kontrolloheshin nga forcat amerikane dhe aleatët e tyre kurdë.
Ky vendim i SHBA-së vjen disa ditë pasi presidenti Donald Trump njoftoi për tërheqjen e trupave amerikane nga zona kufitare me Turqinë, ku Ankaraja kërkon të krijojë një “zonë të sigurt” nga luftëtarët kurdë, të cilët i konsideron ‘terroristë’.
Sekretari Esper nuk dha më shumë detaje lidhur me dërgimin e trupave amerikane. Por ai tha se forcat do të “mekanizohen”, që do të thotë se me gjasë do të përdoren makina të blinduara për transportin e këmbësorisë, të tilla si Bradley dhe ndoshta edhe tanke.
Esper tha se qëllimi kryesor është të vijohet me praninë e trupave amerikane, me qëllim që militantët e IS-it të mos mund të rikthejnë kontrollin e vendeve me naftë./Opinion.al/
