Një anëtar i Gardës Kombëtare Ajrore në SHBA do të dalë në gjykatë të premten në lidhje me rrjedhjen e dokumenteve shumë të qeverisë amerikane në lidhje me luftën në Ukrainë dhe çështje të tjera të sigurisë kombëtare.
21-vjeçari Teixeira u arrestua në shtëpinë e tij në Masaçusets nga oficerët e FBI-së pa bërë rezistencë. Akuzat ndaj tij do të ngrihen në bazë të një dispozite të Ligjit për Spiunazhin, që e konsideron krim marrjen ose transmetimin e informacionit të klasifikuar të mbrojtjes kombëtare, tha pas arrestimit Prokurori i Përgjithshëm Merrick Garland.
Ai akuzohet për publikim të paautorizuar të informacioneve shumë të klasifikuara dhe do të dalë sot në gjykatën në Boston.
Në dokumente u zbuluan vlerësimet e SHBA-së për luftën në Ukrainë, si edhe sekrete rreth aleatëve amerikanë, duke vënë në pikëpyetje sigurinë e dokumenteve të klasifikuara.
Teixeira punonte si specialist i IT-së në Gardën Kombëtare të Massachusetts. Ai iu bashkua Gardës Kombëtare në vitin 2019, sipas CBS News. Teixeira raportohet se ishte drejtuesi i një grupi online në internet të përbërë kryesisht nga meshkuj adoleshentë, me të cilët dyshohet se ka ndarë informacione sekrete për muaj të tërë.
Të paktën 50 dokumente të klasifikuara u postuan në Discord, një platformë e mediave sociale.
