Sekretari amerikan i Shtetit, Mike Pompeo, akuzoi regjimin sirian për përdorim të gazit të klorit në një sulm kundër rebelëve në verilindje të Sirisë.
Pompeo tha se sulmi që bie në kundërshtim me konventat që ndalojnë përdorimin e armëve kimike ka ndodhur në provincën Latakia, më 19 maj.
“Shtetet e Bashkuara do të vazhdojnë t’i bëjnë presion regjimit tinëzar të Bashar al-Assad, për t’i dhënë fund dhunës së drejtuar kundër civilëve sirianë”, tha Pompeo.
Ai tha se qeveria siriane ka përdorur armë kimike çdo vit nga 2013-ta, kur Damasku i është bashkuar konventës ndërkombëtare që ndalon përdorimin e tyre. Edhe ekspertët ndërkombëtarë kanë fajësuar Sirinë për disa sulme me armë kimike në vitet e fundit.
Kujtojmë se gati gjysmë milioni njerëz janë vrarë dhe miliona të tjerë janë zhvendosur nga shtëpitë e tyre në Siri prej marsit të vitit 2011, kur nisi lufta civile./Opinion.al
