Industria e ndërtimit në Tiranë ka hyrë në ngërç për shkak se landfilli i Sharrës, i vetmi vend ku ndërtuesit duhet të depozitojnë dherat, nuk ka më hapësirë. Kjo ka sjellë pezullimin e shumë projekteve ndërtimore duke dëmtuar sipërmarrjet, duke kërcënuar mijëra vende pune dhe duke krijuar një situatë absurde pasi ndërtuesit nuk mund të gërmojnë sepse nuk kanë ku t’i dërgojnë dherat.
Erjon Harizi: Dhe sot jemi në një paradoks, pavarësisht tarifave, pavarësisht vendit, sot Bashkia e Tiranës nuk lidh më kontrata me ndërtuesit, duke sjellë pezullimin e ndërtimit në Tiranë për më shumë se 2 muajsh.
Shoqata e Ndërtuesve që ka ngritur alarmin, kërkon zgjidhje alternative si hapja e vendgrumbullimeve të reja, të cilat mund të krijohen lehtësisht dhe pa probleme për mjedisin për shkak se nuk bëhet fjalë për mbetje urbane apo të kontaminuara.
Erjon Harizi: Ne në bisedat që kemi pasur me organet kompetente kemi kërkuar që Tiranës i duhen të paktën 3 ose 4 landfille të tjera. Nuk kushton asgjë, nuk është që do ndonjë para të madhe që për vend-depozitime të mallrave të pakontaminuar të krijohen në çdo anë të horizontit të Tiranës 2 ose 3 pika landfilli të kontrolluara, sigurisht nga Bashkia e Tiranës. Pra mund të jetë në pronësi të Bashkisë së Tiranës, mund të jepet me koncesion, kjo gjë do ta zgjidhte më së miri këtë problem. Bashkia nuk ka zgjidhje: o aty o s’ka vend tjetër. Nuk kemi marrë asnjë përgjigje për këtë.
Shoqata e Ndërtuesve thotë se në përpjekje për të çuar përpara projektet sipas afateve për të mos shkelur kontratat pasi kjo do të sillte kosto, si dhe për të shmangur një falimentim të mundshëm, ndërtuesit kanë tentuar të përdorin vend-depozitime të tjera, por janë penguar nga autoritetet, të cilat njohin vetëm landfillin e Sharrës si vend-depozitimi.
Erjon Harizi: Handikapi tjetër është që edhe nëse vetë ndërtuesit për dherat, gjithmonë të pakontaminuar, që nuk janë mbetje urbane, gjejnë një vend depozitimi tjetër, këtu pastaj del problemi që Policia e Rendit, natën, ditën, e ka kthyer këtë në një gjueti shtrigash, duke bllokuar mjetet, duke krijuar një presion shumë të madh ndaj personave që merren me këtë zë pune.
Vetë menaxherët e landfillit të Sharrës kanë njoftuar ndërtuesit prej disa muajsh se nuk kanë më vend pë të depozituar dherat, pasi landfilli ka arritur kapacitetin maksimal.
Ndërtuesit thonë nëse autoritetet nuk e zgjidhin këtë krizë, e cila nuk ka të bëjë vetëm me një çështje teknike, ajo do të sjellë kosto serioze për zhvillimin urban, ekonominë e qytetit dhe mbi qindra kompani e familje që varen nga sektori i ndërtimit.
Ndërtuesit thonë se në vend që të trajtohen si mbetje, dherat mund të përdoren për mbushjen e tokave të degraduara, ndërtimin e rrugëve ose projekte të tjera publike.
Tv Klan
