Kapiteni i Zvicrës, Xherdan Shaqiri, ka pranuar se po konsideron të luajë me kombëtaren e Kosovës, nëse kjo e fundit do t’i besojë shiritin e kapitenit. 23-vjeçari Shaqiri ka lindur në Kosovë, por familja e tij emigroi në Zvicër kur ai ishte fëmijë dhe pasi u rrit në akademinë e Bazelit zgjodhi të luante për kombëtaren e Zvicrës. Megjithatë, tani që Kosova është anëtare me të drejta të plota të FIFA-s dhe UEFA-s, të gjithë kosovarët kanë të drejtë të luajnë për vendin e tyre.
Duke folur për gazetën britanike “The Guardian”, Shaqiri deklaroi: “Nëse trajneri i Kosovës do të dojë që unë të jem kapiteni i Kosovës, atëherë do ta mendoj si opsion.” Sipas “The Guardian”, Shaqiri është mërzituar nga trajtimi që ka pasur nga trajneri i Zvicrës, Vladimir Petkovic, i cili nuk e mori në konsideratë në momentin që hoqi Gokhan Inler nga skuadra. Kapiteni i Zvicrës u emërua Stephan Lichtsteiner. Granit Xhaka dhe Valon Behrami, futbollistët e tjerë me gjak shqiptar, janë zgjedhur zv.kapiten dhe kapiten i tretë.
