Një inspektor i Inspektoratit të Shëndetësisë u vu në pranga nga autoritetet policore këtë të enjte në Tiranë, pas një hetimi të SPAK.
Prokuroria e Posaçme kundër Korrupsionit dhe Krimit të Organizuar bën me dije se ka marrë informacion se një person i prezantuar si inspektor pranë Inspektoriatit të Shëndetësisë, shkonte për kontroll në subjekte të ndryshme tregtare në qytetin e Tiranës, tek të cilët ushtronte presion se nuk kishin licencimin e duhur për vijimin e aktivitetit dhe se gjoba në këto raste shkonte deri në 1.000.000 (një milion) lekë, si dhe me mbylljen e biznesit deri në likuidimin e kësaj mase administrative.
Sipas SPAK rezulton se, inspektori M.M., u thoshte subjekteve tregtare se një problem i tillë mund të zgjidhej kundrejt rryshfetit, vetëm pas marrjes prej tij të gjysmës së shumës së gjobës që vihet në raste të tilla, e më konkretisht të shumës monetare prej 500.000 (pesëqind mije) lekë. Por, një pjesë e kësaj shume monetare duhej t’i jepej atij brenda 24 orëve përndryshe inspektori u thoshte bizneseve se do të vijonte me procedurat administrative të aplikimit të gjobës dhe mbylljes së aktivitetit.
Ndërkaq, SPAK njofton se pas hetimeve të nisura ka regjistruar procedim penal për inspektorin, i cili akuzohet për veprën penale “Korrupsioni pasiv i personave që ushtrojnë funksione publike”, dhe e ka arrestuar atë.
Gjatë arrestimit iu sekuestrua dhe shuma monetare prej 200.000 (dyqindë mijë) lekësh, e përftuar në mënyrë të paligjshme.
