Një minorene, nxënëse e klasës së tetë në një shkollë periferike në kryeqytet, është shtrënguar t’u japë shuma parash 100- 2500 lekë të rinj dhe paketa cigaresh dy djemve.
Kjo ka qenë “gjoba” që ajo duhet t’u paguante, pas kërcënimit prej tyre me publikimin e një videoje intime të saj në “Facebook”. Dy djemtë që kanë shantazhuar të miturën, Erald R. dhe Ervin R., kanë qenë bashkëmoshatarë të saj, një prej të cilëve ish-i dashuri.
Ngjarja është shënuar në vitin 2015 dhe për këtë rast kanë përfunduar si të pandehur dy adoleshentët Eraldo R. dhe Ervin R.
Ata janë gjykuar nga Shkalla e Parë dhe së fundmi edhe nga Apeli për Krimet e Rënda, ku janë deklaruar fajtor për akuzën e “shtrëngimit me anë të kanosjes për dhënien e pasurisë” dhe u dënuan me 1.5 dhe 1 vit burg.
Për shkak të moshës së mitur, gjykata ka vendosur pezullimin e ekzekutimit të dënimit me burg dhe lënien e tyre në Shërbim Prove për një periudhë 2.5 dhe 2-vjeçare.
