Kombëtarja shqiptare do të zhvillojë në mesin e nëntorit dy sfidat në Ligën e Kombeve, ku si fillim do të përballet me Çekinë dhe më pas me Ukrainën.
Por katër nga lojtarët e rëndësishëm të kuqezinjve nuk do të jetë pjesë e dy takimeve.
Departamenti i Komunikimit në FSHF bën me dije se Berat Gjimshiti, Keidi Bare, Marash Kumbulla dhe Rey Manaj nuk do të jenë pjesë e grupit për ndeshjet e Nëntorit.
Gjimshiti u dëmtua në ndeshjen e fundit në kampionat ndaj Udinese-s, ndërsa Bare dhe Kumbulla ishin të dëmtuar dhe pas komunikimit të stafit mjekësor të Kombëtares me klubet përkatëse është vendosur që futbollistët të vazhdojnë rikuperimin.
Gjithashtu, Rey Manaj u bashkua në grumbullim me ekipin dhe pas testeve mjekësore, u zbulua se sulmuesi nuk mund të rikuperohet në kohë, prandaj u vendos që të rikthehet në klubin e tij për të vijuar me programin e rikuperimit.
Për shkak të këtyre katër mungesave trajneri Silvinjo ka vendosur të grumbullojë për ndeshjet Adrian Bajramin, Jon Mersinajn dhe Arbnor Mujën. Lojtarët pritet të bashkohen me kuqezinjtë gjatë të martës për të nisur stërvitjen.
Në seancën e zhvilluar sot në stadiumin “Air Albania” morën pjesë Ylber Ramadani, Myrto Uzuni, Ivan Balliu, Kristjan Asllani, Ardian Ismajli, Arbër Hoxha, Mario Mitaj, Alen Sherri, Simon Simoni, Elseid Hysaj, Andi Hadroj, Thomas Strakosha dhe Feta Fetai.
Kujtojmë se Shqipëria do të përballet me Çekinë më 16 Nëntor dhe me Ukrainën tre ditë më vonë.
