Pasditen e sotme, ministri i Brendshëm, Taulant Balla ka qenë i pranishëm në aktivitetin për bilancin e sezonit turistik.
Balla tha gjatë fjalës së tij se këtë vit, Shqipërisë i është pastruar imazhi i nxirë nga një kohë shumëvjeçare.
Sipas ministrit, turistët e huaj gjetën siguri në Shqipëri dhe kjo falë punës së Policisë.
“Mund ta themi me krenari se Shqipërisë i është pastruar imazhi i nxirë nga një kohë shumëvjeçare. Një pjesë e mirë e artikujve që u shfaqën në gazeta, revista për këtë sekret të zbuluar në mes të Evropës, nënvizoi edhe faktin se turistët e huaj gjetën në Shqipëri një siguri mbresëlënëse. Shqipëria mban numrin më të ulët të vjedhjeve në raport me banorët. Policia në këto 9 muaj ka arrestuar qindra persona. Nuk është regjistruar asnjë ngjarje kriminale ndaj turistëve të huaj. Që nga dita e parë e marrjes së detyrës kam vizituar pikat kufitare tokësore. Siguria e turistëve është parësore. Policia e Shtetit e ka kryer më së miri këtë operacion të madh për mbarëvajtjen e sezonit turistik. Po ashtu doja t’ju informoja se do vijmë me një masë të re për fishekzjarrët që hidhen në mesnatë në të gjithë vendin”,-tha Balla.
