Ndërsa shtatori pritet të sjellë edhe ndryshime në kabinetin qeveritar dhe mandatimin e qeverisë së tretë të drejtuar nga Edi Rama, pikëpyetjet janë të shumta lidhur me emrat e rinj që do të hyjnë në kabinet dhe ata që do të mbeten.
I pyetur në News 24, nëse pret të jetë sërish në kabinet, Ministri i Turizimit dhe Mjedisit Blendi Klosi, u shpreh se në politikë vendosin forumet dhe votat e qytetarëve.
“I kam parë edhe kolegët , disa prej tyre edhe bëjnë lajm. Ka nevojë këtu të kesh edhe një farë eksperience. Unë fatmirësisht e kam këtë eksperiencë modeste për të thënë që ne jemi në këtë detyrë të zgjedhur nga forumet. Je në politikë për sa kohë merr votat e forumeve, votat e qytetarëve. Janë forumet ato që të vendosin të shkosh përpara, të kesh një funksion administrativ apo një funksion politik, ndaj nuk është gjë që ka të bëjë me dëshirën e individit kjo punë. Kjo është diçka që ka të bëjë me performancën e ekipit me atë çfarë thash që mandati I tretë duhet të jetë një mandat shumë I fortë përsa i përket punëve të realizuara, por ka edhe diçka tjetër, që në detyrën tonë është një maratonë e gjatë për të gjithë ata që në këtë ekip vlejnë edhe duan të bëjnë punë të mira”, u shpreh Klosi.
Kujtojmë se Blendi Klosi u rendit I pesti në listën e Beratit dhe arriti ta fitojë këtë mandat, ndërkohë që në zgjedhjet e vitit 2017 PS kishte patur 4 mandate në këtë qark./Opinion.al
