Kuvendi i Serbisë ka miratuar raportin për Kosovën me 145 vota pro dhe katër kundër.
Presidenti i Serbisë, Aleksandar Vuçiq gjatë diskutimeve dyditore të raportit në Kuvendin e Serbisë ka thënë se “Serbia duhet ta pranojë se e ka humbur kontrollin mbi Kosovën dhe se duhet të gjejë kompromis me Prishtinën për të normalizuar raportet”.
Deputetët kanë diskutuar për raportin me 82 faqe, në të cilin në 17 faqe paraqiten të dhënat mbi dialogun ndërmjet Beogradit dhe Prishtinës nga viti 2013 deri në maj 2019, ndërsa pjesa tjetër paraqet rezultatet më të rëndësishme të zyrës për Kosovën nga maji 2014 deri në vitin 2019.
Raporti është përpiluar nga zyra për Kosovën në Qeverinë e Serbisë dhe në të thuhet se dialogu ka punuar për interesat e serbëve, teksa shton se gjatë periudhës së bisedimeve është arritur të ruhet qetësia në Kosovë dhe më gjerë.
Pala serbe është tërhequr nga dialogu për normalizimin e marrëdhënieve me Kosovën, prej nëntorit të vitit të kaluar, kur Kosova iu ka vënë taksë 100% mallrave të importuara nga Serbia.
Vuçiq ka thënë se nuk do t’i rikthehet dialogut sa kohë taksa mbetet në fuqi, ndërsa kryeministri i Kosovës, Ramush Haradinaj, ka këmbëngulur se ajo nuk do të hiqet derisa Serbia të njohë Kosovën si shtet sovran./Opinion.al
