Mediat serbe kanë dënuar sjelljen e tifozëve shqiptarë gjatë sfidës së mbrëmshme, 7 qershor, Shqipëri-Serbi. Në disa tituj të tyre gjen edhe fraza të ekzagjeruara, ku thuhet se huliganët shqiptarë goditën lojtarët serbë në kokë disa herë, pasuar me ndërprerjen e ndeshjes. Gjithë atmosferën në Tiranë nuk hezitojnë ta quajnë “terror”, “skandaloze” apo “ferr”.
Në artikujt e tyre për këtë sfidë shumë të diskutuar, veçojnë momentin e penalltisë si më të rëndësishmin në favorin e tyre. Portierin serb, Đorđe Petrović, e quajnë heroin e kësaj përballjeje.
“Terror në Tiranë! SHQIPTARËT NUK NDALEN ME SKANDALET! Huliganët shënjestrojnë përsëri futbollistët tanë. Gjyqtari NUK E NDAL NDESHJEN!”, është një nga titujt “pompozë”.
“Kombëtarja serbe e futbollit 0:0 kundër Shqipërisë në transfertë. Edhe pse publiku në vendin tonë priste tre pikë, në fund një njeri është përgjegjës për fitoren e “shqiponjave” dhe emri i tij është Đorđe Petrović”, shkruan blic.rs.
“Ndeshja u shënua nga sjellja e tmerrshme e huliganëve shqiptarë të cilët ndërprenë duelin pesë herë duke i goditur lojtarët e Serbisë me sende në kokë”, shkruhet në artikullin e kurir.rs.
“Serbia luajti pa gola në Tiranë në atmosferën e zjarrtë të stadiumit “Air Albania” në një ndeshje që u ndërpre shkurtimisht tre herë për shkak të të shtënave të lojtarëve mysafirë nga tribunat”, shkruan një tjetër media serbe.
“Ndeshja u luajt në kushte të vështira, për shkak të sjelljes së pakuptueshme të tifozëve shqiptarë, të cilët goditën tre futbollistë serbë në kokë me sende të ndryshme‘, raporton një tjetër.
“Kombëtarja serbe e kontrolloi ndeshjen në pjesën më të madhe dhe kishte më shumë posedim të topit, por pati vetëm një shans premtues, kur portieri shqiptar bëri një pritje të shkëlqyer të gjuajtjes së Aleksandar Mitrović. E vetmja pikë e ndritshme vazhdimisht për ekipin e Dragan Stojkoviç ishte portieri, i cili është përgjegjës për të siguruar që Serbia të mos largohet nga Tirana pa pikë”, shkruan sportal.blic.rs.
Shqipëri-Serbi u luajt në stadiumin “Air Albania” dhe pavarësisht rasteve të Kombëtares tonë, përfundoi pa asnjë gol.
Sfida e radhës për Shqipërinë është në transfertë ndaj Letonisë, ndeshje e cila po ashtu do të transmetohet në Tv Klan. /tvklan.al
