Një ndeshje futbolli, e cila i vlen Kombëtares drejt ëndrrës për Botërorin 2026. Por, nëse përballja e 7 qershorit po përgatitet me kujdes maksimal, që gjithçka të shkojë më së miri në fushë dhe në tribuna, mediat serbe e kanë shfrytëzuar qetësinë për të përgjuar në mënyrë sekrete përgatitjet e kuqezinjve.
Gazeta Kurir publikoi pamje video dhe fotografi nga stërvitja me dyer të mbyllura e Kombëtares. Edhe pse sipas rregullit asnjë media nuk duhet të jetë e pranishme në seancë pas 15 minutave të para, gazetarët serbë u pozicionuan në distancë për të vëzhguar taktikat e Sylvinho-s.
Bëhet fjalë për seancën e së enjtes, e cila është zhvilluar në ambientet e Shtëpisë së Futbollit. Përveç pamjeve nga lartësia, por edhe fotografive nga jashtë rrethimit, serbët siguruan edhe pamje nga poshtë fushës.
Gjatë përgjimeve të stërvitjes, drejtuesi i stolit ishte angazhuar edhe vetë mes futbollistëve. Serbët nuk kanë dhënë detaje për atë që kanë kuptuar nga taktika, por ndoshta Sylvinho duhet të mendojë të ndryshojë planet.
Tv Klan
