Një ndeshje të vështirë e cilësoi trajneri i Serbisë, Dragan Stojkoviç, atë me Shqipërinë të shtunën në Tiranë. Ndryshe nga mediat serbe, ai quajti fantastike atmosferën në stadium, ndërsa u përfshi në replika me gazetarët për lojën që zhvilloi skuadra e tij.
“Një ndeshje shumë e vështirë kjo ndaj Shqipërisë në Tiranë. Ne kishim kontrollin e topit. Nuk ju pëlqeu loja? Nuk ju pëlqeu? Gjeni një trajner tjetër! Atmosfera ishte fantastike. I përgëzoj tifozët shqiptarë për këtë. Do të doja një atmosferë të tillë, por është e habitshme sa sende hodhën drejt lojtarëve serbë.”
Për kapitenin e Serbisë, Aleksandar Mitroviç, pika e marrë duhet t’i kënaqë.
“Në fund duhet të jemi të kënaqur me pikën e marrë, duke parë se si shkoi ndeshja. Megjithatë, të mbetet një shije e keqe. Kemi ende sfida për të luajtur, të përgatitemi dhe të fitojmë.”
I kënaqur ishte edhe portieri serb që ndali penalltinë e Manajt.
“Një ndeshje jashtëzakonisht e fortë, me shumë duele, pasime të gjata. E kontrolluam ndeshjen më së shumti në qarkullimin e topit dhe patëm raste”, tha Djordje Petroviç.
Disa nga mediat serbe e quajtën një ferr ndeshjen me Shqipërinë, duke shkuar deri aty sa të shkruanin se futbollistëve të tyre iu rrezikua jeta në Tiranë.
Mëngjesin e së dielës, skuadra serbe u largua pa asnjë shqetësim nga Shqipëria, e shoqëruar nga forcat e policisë deri në pistën e aeroportit të Rinasit. Kjo ishte ndeshja e parë për Serbinë në kualifikueset e Botërorit 2026, ku të martën do të presë Andorrën në Leskovac. Tv Klan
