Zv. Kryeministrja Senida Mesi ka qenë sot e pranishme në Shkodër, në një tryezë të organizuar nga Ambasada Britanike, lidhur me adresimin dhe parandalimin e krimit vecanërisht tek të rinjtë.
“Jemi plotësisht të angazhuar në adresimin dhe parandalimin e krimit tek të rinjtë dhe kemi ndërmarrë nisma konkrete si policimi në komunitet apo përfshirja e Oficerëve të Sigurisë në shkollat e mesme”, u shpreh Mesi.
Ndërkohë ambasadori i Britanisë së Madhe, Duncan Norman bëri me dije se rreth 700 shqiptarë rezultojnë të burgosur në Britaninë e Madhe për veprimtari kriminale dhe 50 % e tyre janë nga qarqet veriore të vendit.
Ai theksoi mbështetjen afatgjatë për Shqipërinë në çdo fushë, edhe pse Britania e Madhe tashmë nuk është më pjesë e BE.
E pranishme në këtë takim, kryebashkiakja e Shkodrës Voltana Ademi, tha se krimi i organizuar është një problem dhe Shqipëria vijon jetë vend prodhimi e trafikimi i drogës.
“Krimi, sidomos ai i lidhur dhe mbrojtur në bashkëpunim me politikën, është shqetësim real dhe vazhdon të jetë i tillë për shoqërinë shqiptare. Krimi i organizuar është realitet i hidhur për vendin tonë. Shqipëria vazhdon të jetë fatkeqësisht vend prodhimi dhe eksportimi i drogës. Droga është biznes fitimprurës për trafikantët. Ka katër urdhër-arreste për ish drejtues të lartë të shtetit, që dyshohen si të përfshirë në trafikun e drogës bashkë me ish-ministrin e Brendshëm. Unë do kisha një sugjerim për organizatorët, por edhe për të gjithë ne, përfaqësuesit e ministrisë dhe policisë të ishin këtu se kanë funksionin e parë ligjor”, u shpreh Ademi.
Zëvendës Kryeministrja iu përgjigj akuzave të Kryebashkiakes duke u shprehur se nuk është aspak me vend të dëgjojmë retorikë politike në tryeza të tilla, që kërkojnë statistika serioze dhe bashkëpunim për parandalimin e krimit, dhe jo disa të dhëna që janë mbledhur nga disa specialistë IT që nuk kanë bërë mirë detyrat e shtëpisë! Ajo kërkoi shembuj suksese nga Bashkia e Shkodrës dhe i kerkoi Kryebashkiakes të tregojë vizion e lidership.
“Nuk përshëndes statistikat të bëra nga një specialiste e rëndomtë, pa bërë mirë detyrat e shtëpisë. Dëgjoj shembuj suksesi të Malësisë së Madhe, por nuk dëgjoj asnjë shembull suksesi në Bashkinë Shkodër. Jemi këtu për të adresuar problematika dhe për të zgjidhur ato çështje.
Të tregojmë vizion, lidership dhe qeverisje. Do doja sugjerime, rekomandime, punë të përbashkët me qëllim që krimin e organizuar, përfshirë dhe në politikë, meqë Ademi e ka me shumë merak, ta shohim çdo ditë”, tha Mesi.
Znj. Mesi u largua pa përfunduar takimi, gjë që solli reagimin e deputetit Gurakuqi i cili i kërkoi Zëvendës Kryeministres të qëndrojë e të japë përgjigje për problemet e vendit.
Zëvendës Kryeministrja e ftoi deputetin Gurakuqi në zyrë për të dialoguar.
Ndërkohë mësojmë se Znj. Mesi është larguar pasi ka marrë pjesë në mbledhjen urgjente të qeverisë.
Burime bëjnë me dije se Rama ka thirrur urgjent mbledhjen e qeverisë për të diskutuar mbi taksën e Rrugës së Kombit pas ngjarjeve të trazuara që kanë ndodhur këto ditë që sollën edhe 11 të arrestuar nga protesta në Kukës.
