Dhe pse i sigurisë së lartë, Burgu i Peqinit ka funksionuar jashtë çdo sistemi sigurie. Të gjitha konstatimet janë bërë nga drejtori i komanduar Kamber Hoxha, i cili mori detyrën më 22 nëntor.
Më datë 30 nëntor ai i dërgoi drejtorit të përgjithshëm të burgjeve Admir Abrija, të gjitha shkeljet e konstatuar, 15 ditë para se të ndodhte vrasja në qeli.
Në drejtim të elementëve të sigurisë, drejtori Hoxha, thotë se nuk funksiononte skaneri dhe se disa ambjente, nuk monitoroheshin me kamera. Një tjetër problem që cënon sigurinë sipas Hoxhës, janë drynat dhe shulat e qelive jashtë çdo standardi.
“Sistemi i monitorimit të kamerave të sigurisë, ka probleme me teknologjinë, në regjim të brendshëm ka ambiente që përdoren për aktivitete të ndryshme që janë të pa monitoruara nga kamerat e sigurisë. Të dy sektorët mbulohen vetëm me një kamerë.
Të gjitha dyert e banimit të burgosurve në sektorë hapen me një çelës të vetëm, ndërsa drynat e shulave të cilët mbyllen në turnin e tretë, janë cilësi shumë e dobët, gjë e cila cënon rëndë sigurinë e institucionit dhe vetë të burgosurve.”
Një tjetër problematikë që ngre Hoxha është dhe lejimi pa kriter i sendeve dhe se të gjitha këto janë kryer pa një plan masash.
“Futja/lejimi, si dhe përdorimi pa asnjë kriter nëpër dhoma banimi/ambjente të përbashkëta pa asnjë urdhër apo plan masash i veglave dhe materialeve artizanale, jo vetëm bën të vështirë gjetjen dhe kapjen e sendeve të ndaluara, por rrezikon seriozisht jetën e personelit/burgosurve dhe cënon rëndë sigurinë e burgut.
Në godinat (A/B/C) pothuajse të gjitha ambientet e përbashkëta, dushe, klasa dhe dhoma këshillimi janë shndërruar në palestra të personalizuara, ku nuk kanë akses të gjithë të burgosurit. Forca e të burgosurve ka shkuar dhe më tej.”
Sipas drejtorit, të dënuarit kanë personalizuar dhe privatizuar ambjentet e përbashkëta në burg. Gjithashtu, të burgosurit nuk pranonin të tjerë persona në qeli pasi kishin kryer investime.
“Në dhomat të takimeve të zgjatura janë bërë ndërhyrje nga të burgosurit, arredime, kompletim me krevate /dyshekë/ kondicionerë /televizorë /ekspres kafeje etj). Nga informacionet që kemi këto dhoma janë të personalizuara.
Tashmë thuajse të privatizuara, ndërhyrja në dhoma ka kufizuar shumë mundësinë e kontrolleve për elemente sigurie dhe sende të ndaluara. Ndërsa të ju kërkosh të marrin të burgosur të tjerë nëpër dhoma mesa kuptohet ka qenë në kufijtë e të pamundurës, fenomen që shpjegohet nga 160 shtretër bosh.”
Drejtori i komanduar Kamber Hoxha së bashku me 10 vartës të tij u lanë në burg nga gjykata e Elbasanit.
Ata do të hetohen për “shpërdorim detyre” në rastin e vrasjes së të dënuarit Arben Lleshi nga Sokol Mjacaj./tvklan
