Në qytetin grek, të Selanikut, arkeologët kanë zbuluar një numër të madh objektesh të lashta, si kurora, unaza prej ari, statuja, ndërtesa dhe varre . Zbulimi i tyre erdhi pas punimeve për ndërtimin e një rrjeti të ri metroje, punime të cilat janë pezulluar për shkak të zbulimeve mbreslënëse të nëntokës.
Gjatë punimeve fillimisht u zbulua një rrugë e shtruar me gurë, ‘Decumanus Maximus’, që kalonte në zemër të Selanikut, rajonit të dytë më të rëndësishëm në Perandorinë Bizantine pas Kostandinopojës, në shekullin e gjashtë pas Krishtit, dhe në të u gjetën mbetjet e vilave, dyqaneve, punëtorive, një kishë e hershme, si dhe 5.000 varre, shumë prej të cilave me kurora të arta.
Më pas arkeologët gërmuan më shumë se 300,000 artefakte, nga monedha dhe stoli në statuja mermeri, amfora, llamba nafte dhe vazo parfum, të cilat u gjetën në atë që mendohet se ka qenë një qendër e lulëzuar tregtare në qytetin e lashtë.
“Gërmimet janë projekti më i madh arkeologjik i viteve të fundit në Greqi. Cilësia dhe sasia e gjetjeve është me të vërtetë mbresëlënëse, një thesar i jashtëzakonshëm. Ata zbulojnë vazhdimësinë e historisë së Selanikut dhe Maqedonisë. Një numër i madh statujash që përshkruajnë Afërditën janë gjetur në qendër të qytetit, ndërsa disa të tjera u zbuluan në zonën rreth Kishës së Acheiropoietos (një kishë bizantine e shekullit të pestë)” tha Dr Polyxeni Adam-Veleni, kreu i departamentit të Antikitetit në Selanik./Opinion.al
