Roja bregdetare e Brindisit ka arritur të sekuestrojë mbrëmjen e së shtunës 2.5 ton drogë që sipas medieve italiane ishte e nisur nga Shqipëria.
Sipas “Brindisi Report”, roja bregdetare e Brindisit, pjesë e Guardia di Finanzas, e koordinuar nga Departamenti i Operacioneve nga Ajri të Barit, pikasi anijen me sasinë e madhe të marijuanës që besohet se vinte nga Vlora.
Nga ajo që ka mësuar media italiane deri më tani rezulton se trafikantët ia kanë dalë të largohen nga anija para mbërritjes së policisë.
Policia e Barit nuk ka dhënë ende informacion të saktë mbi operacionin që i jep një tjetër goditje trafikimit të drogës nga Shqipëria në Itali.
Ndërkohë policia shqiptare ka bërë me dije se nuk dihet origjina e lëndës narkotike.
Njoftimi i plotë i policisë
GdF italiane sekuestron 2.5 ton marijuanë, e cila u hodh në det nga trafikantët.
• Në operacion pas interceptimit të gomones edhe Policia Kufitare e Shqipërisë dhe Malit të Zi
• Nuk dihet ende origjina dhe vendi nga ku u nis gomonia drejt Italisë
Në datë 9 Qershor 2018, rreth orës 16:25, një avion i Guardia di Finanza të Pulias gjatë kontrollit në hapësirën detare, pikasi një mjet lundrues që lëvizte me shpejtësi në ujërat italiane, në largësi rreth 40 milje nga bregu.
Menjëherë në ndjekje janë vënë 2 mjete lundruese të GdF duke e interceptuar mjetin lundrues të llojit gomone, i cili ishte i ngarkuar dhe lëvizte me shpejtësi.
Ndërkohë partnerët italianë kanë njoftuar Policinë Kufitare në Shqipëri. Disa mjete të Policisë Kufitare dhe të Guardia di Finanza në Durrës dhe Vlorë janë vënë në gadishmëri, në pritje të hyrjes së gomones në ujërat territoriale shqiptare.
Por gomonia e ngarkuar, në ndjekje nga GdF ka shtuar shpejtësinë duke hedhur në det ngarkesën.
Më pas ajo i është drejtuar territorit të Malit të Zi, duke u futur në këto ujëra.
Policia malazeze e ka interceptuar gomonen, por pas një ndjekje për rreth 1 orë, ka humbur gjurmët e saj.
Ndërkohë që Guardia di Finanza ka rikuperuar mallin e hedhur në det në ujërat ndërkombëtare në afërsi të ujërave territoriale të Malit të Zi, ku rezultoi 2 ton e 475 kilogramë marijuanë.
Autoritetet policore në 3 shtetet po vijojnë hetimet dhe shkëmbimin e informacionit për zbulimin dhe ndalimin e trafikantëve, por ende nuk ka të dhëna për origjinën e mallit dhe shtetin nga ku mund të jetë nisur gomonia.
