Policia do të njoftonte këtë të hënë se kishte sekuestruar prona me vlerë rreth 1 milionë euro. Këto prona janë të një 40-vjeçare nga Pogradeci, Almanda Durollari dhe bashkëjetuesit të saj italian, Francesco Cocilovo, 42 vjeç.
Pasuritë mbi të cilat është vendosur sekuestro preventive pas 7 muajsh hetime, dyshohet se rrjedhin nga aktiviteti i paligjshëm i 40-vjeçares bashkëjetuesit të saj italian, të cilët akuzohen për veprën penale “Pastrimi i produkteve të veprës penale apo veprimtarisë kriminale”. Pronat, kryesisht apartamente banimi, u sekuestruan me vendim të Gjykatës së Pogradecit, më 5 korrik 2019.
Sekuestrohen 1 milion euro pasuri të paluajtshme
Almanda Durollari bashkëjeton me italianin Francesco Cocilovo dhe banojnë në Itali. Për të fshehur dhe justifikuar këto prona të blera në Shqipëri, i kanë regjistruar në emër të pensionistes Vergjinush Durollari, 76 vjeç nëna e 40-vjeçares, e cila banon në Pogradec.
Almanda dhe Francesco janë hetuar nga autoritet gjyqësore italiane në Como, për akuzën e mashtrimit me TVSH, falsifikimit dhe shitjes së produkteve me shenja false, duke përfituar në formën e rimbursimit nga ministria e Financave Italiane, një shumë prej mbi 2.388.611 Euro.
U sekuestruan pasuri me vlerë 1 milionë euro: 2 apartamente banimi në Pogradec, me sipërfaqe 175 m2; 4 apartamente banimi në Tiranë, me sipërfaqe 420 m2; 1 njësi shërbimi në Tiranë, me sipërfaqe 106.5 m2/ Opinion.al
