Policia e Shtetit ka sekuestruar prona që kapin vlerën e rreth 3 milionë eurove, në pronësi të biznesmenit të dëbuar nga Italia, Gëzim Sallaku, të vëllait të tij, Saimir Sallaku, si dhe të shtetasit Rabi Kurti.
Në një njoftim zyrtar, autoritetet bëjnë me dije se u bë i mundur finalizimi i hetimeve 3-vjeçare në ngarkim të dy vëllezërve dhe të një shtetasi tjetër, me të cilin dy vëllezërit kanë lidhje shoqërore.
Si rezultat i hetimeve të kryera dhe provave të grumbulluara, Gjykata e Rrethit Gjyqësor Durrës vendosi sekuestron preventive për pronat e shtetasve Gëzim Sallaku, Saimir Sallaku, si dhe të shtetasit Rabi Kurti, banues në Durrës, prona të dyshuara të përfituara nga veprimtaria kriminale e shtetasit Gëzim Sallaku, të cilat janë të regjistruara edhe në emër të vëllait dhe shokut të tij, konkretisht:
Sekuestrohen 100% të aksioneve të shoqërisë “GSA Sallaku” sh.p.k, me aktivitet “Import, eksport, tregti autoveturash, kamionësh etj”, me seli në Durrës, me ortak të vetëm dhe administrator shtetasin Gëzim Sallaku; 2 apartamente, në Durrës, në emër të shtetasit Gëzim Sallaku; 20.600 m2 sipërfaqe toke arë, në Durrës, në emër të shtetasit Gëzim Sallaku; 1000 m2 sipërfaqe toke truall, mbi të cilën janë ndërtuar 2 banesa me sipërfaqe 140 m2 secila, në Durrës, në emër të shtetasit Gëzim Sallaku; Një godinë banimi dykatëshe dhe 2 apartamente banimi, në Durrës, në pronësi të shtetasit R. K.; 13 automjete të markave të ndryshme në pronësi të shoqërisë tregtare “GSA Sallaku”.
Vazhdon puna nga Njësia e Hetimit të Krimit Ekonomik e Financiar, për identifikimin e pasurive të tjera të këtyre personave dhe lidhjeve të tyre familjare dhe shoqërore.
Shtetasi Gëzim Sallaku ka kryer veprimtari kriminale dhe është dënuar në shtetin italian nga viti 1999 – 2008.
Autoritetet në vitin 2018, nisur nga disa transferta të dyshimta bankare të shtetasve të sipërpërmendur, kanë filluar hetimin për veprën penale “Pastrimi i produkteve të veprës penale ose të veprimtarisë kriminale”.
Materialet për ekzekutimin e Vendimit të Gjykatës iu dërguan Prokurorisë pranë Gjykatës së Shkallës së Parë Durrës./Opinion.al
