Një grup kriminal shqiptaro-italian i trafikut të drogës është goditur nga policia italiane, ndërsa mediat vendase bëjnë me dije se janë ndaluar 15 persona.
Masat kufizuese, janë firmosur nga gjyqtari për hetimet paraprake të Gjykatës së Barit, ndërsa raportohet se janë sekuestruar asete mbi 1 milion euro.
Të dyshuarit akuzohen për trafikim të paligjshëm të substancave narkotike, prodhim, trafik dhe mbajtje të paligjshme të drogës, pastrim parash dhe armëmbajtje pa leje. Mes të arrestuarve është edhe shqiptari 30-vjeçar, Klisman Curraj, i identifikuar nga mediat italiane.
Hetimet u kryen nëpërmjet përdorimit jo vetëm të veprimtarive të policisë gjyqësore si përgjimet telefonike, analiza e të dhënave telefonike, por edhe ekzaminimi i përmbajtjes së mesazheve të shkëmbyera në platformën e koduar “Sky Ecc”.
Pika e nisjes në hetimin e drejtuar nga Drejtoria Antimafia e Qarkut, ishte arrestimi i kryer në Francë më 26 tetor 2019, i një 47-vjeçari nga Torre Canne, Massimo Duca, i arrestuar me 75 kilogramë kokainë me destinacion Italinë dhe 865 mijë euro.
Sipas mediave italiane bëhet fjalë për një rrjet të mirëorganizuar që organizonte transportin e drogës kryesisht nga toka falë makinave të modifikuara.
Në total gjatë operacionit është sekuestruar 127 kilogramë kokainë, ajo e bardhë dhe 142 kilogramë marihuanë, ajo e gjelbër ose e perimeve, siç e quajnë korrierët, si dhe 1.3 milionë euro para cash, që besohet se janë të ardhura që vijnë prej veprimtarive të paligjshme.
