Policia greke ka sekuestruar kokainë me vlerë 2 milionë euro në Portin e Pireut.
Në një deklaratë për shtyp policia greke informon se të hënën ka sekuestruar 64 kg kokainë në 58 pako, në një anije kontejner në portin e Pireut, të ardhur nga Ekuadori.
Kartelet nga Amerika Latine kanë kuptuar se tanshmë organet e ndjekjes së Evropës po kontrollojnë vazhdimisht kontejnerët që transportojnë fruta dhe veçanërisht banane dhe kështu këtë herë u përpoqën të dërgonin kokainën, të fshehur në motorin e frigoriferit të kontejnerit, por në një ngarkesë me karkaleca deti.
“Në kuadër të hetimeve dhe në vijim të shfrytëzimit të informacionit të marrë nga Agjencia Amerikane e Ndjekjes së Drogës. (D.E.A.), u gjet një kontejner me origjinë nga Ekuadori, në të cilin u gjetën dhe sekuestruan 58 pako të improvizuara me gjithsej 64 kilogramë kokainë”, njoftoi policia.
Fitimi i pritshëm nga importimi dhe shitja e sasisë së konfiskuar të kokainës e kalon shumën prej 2.000.000 euro, ndërsa hetimet për identifikimin dhe arrestimin e autorëve vijojnë./Opinion.al
