Disa ditë më parë, kryeprokurori Olsian Çela shprehur shqetësimin e tij në Komisionin e Ligjeve në lidhje me fenomenin e kultivimit të kanabisit. Sipas tij, në 4 qarqe në veçanti vërehet rritje e prodhimit, ndër të cilat ishte edhe Gjirokastra.
Kjo duket se reflektohet edhe në aksionet e policisë në këtë qark, ku në dy operacione blic u arrestuan 2 persona dhe u sekuestruan 370 fidanë kanabis gati për mbjellje.
Në pranga përfundoi shtetasi Alfred Lena, 42 vjeç, nga Kurveleshi, të cilit iu gjet në banesë 50 fidanë kanabis sativa që ishin gati për t’u mbjellë në parcelë.
Gjithashtu gjatë një aksioni të dytë, po në qytetin e Tepelenës, u arrestua edhe Sokol Petani, 43 vjeç, i cili u kap me 320 fidanë me kanabis sativa.
Policia e Gjirokastrës njofton se po vijon ende aksionin në Tepelenë dhe Përmet për të zbuluar dhe asgjësuar rastet e tjera të kultivimit të drogës. /Opinion.al
