34 mijë euro janë sekuestruar nga Policia Kufitare e portit të Durrësit, pasi dyshohet se janë përfituar nga veprimtari kriminale.
Policia ka ushtruar kontroll në furgonin e linjës “Bari-Durrës”, me drejtues shtetasin J. Z.
Gjatë kontrollit në këtë automjet u gjetën 34 000 euro, të cilat shoferi ua kishte ndarë 4 pasagjerëve në furgonin e tij, me qëllim futjen në vendin tonë, pa i deklaruar konform ligjeve në fuqi.
Në përfundim të veprimeve procedurale, u arrestua në flagrancë shtetasi J. Z., 38 vjeç, banues në Tiranë, për veprat penale “Mosdeklarimi në kufi i të hollave dhe i sendeve me vlerë” dhe “Pastrimi i produkteve të veprës penale ose veprimtarisë kriminale”.
Në drejtimin e Prokurorisë, vijojnë hetimet me qëllim dokumentimin e plotë ligjor të këtij rasti. Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme procedurale.
