Një sasi rekord kokaine është sekuestruar nga policia italiane në Milano dhe në periferi të saj, në komunën Agrati.
Bëhet fjalë për 202 kg kokainë, që u sekuestrua në dy raste.
Pjesa e parë e drogës, 142 kg kokainë u gjet e fshehur brenda 4 makinave të parkuara në parkingun e varrezave në Agrati. Dy shqiptarë, të moshave 44 vjeç dhe 37 vjeç, u arrestuan gjatë aksionit policor.
Njëri prej tyre kishte marrë me qira një garazh dhe një apartament në zonë. Lënda narkotike ishte fshehur në vende të posaçme brenda automjeteve.
Në rastin e dytë u sekuestrua një sasi prej 60 kg kokainë në Milano në një makinë me targa angleze. Një shqiptar i tretë u arrestua gjithashtu. Të dy rastet kanë lidhje me njëra-tjetrën. Sipas mediave italiane, shqiptari i tretë që u kap në Milano e kishte marrë sasinë prej 60 kg kokainë nga automjetet e parkuara pranë varrezave.
Sipas policisë italiane, vlera e kokainës së sekuestruar përllogaritet në rreth 15 milionë Euro.
Një sërë kontrollesh u kryen në disa banesa dhe ambiente të marra me qira prej shqiptarëve në Milano dhe komunën Agrati. Brenda tyre u gjetën makineri për numërimin e parave, një çantë me 3000 kartmonedha false, 80 mijë Euro cash nga të cilat 18 mijë Euro janë false.
Identiteti i shqiptarëve të arrestuar nuk është bërë i ditur.
