Policia e Shtetit të premten pasdite ka dhënë detaje në lidhje me sekuestrimin e pronave të Klement Balilit në Sarandë.
Përveç hotelit të famshëm në Sarandë, “Santa Qauranta”, Policia e Shtetit njoftoi se ka sekuestruar edhe 36 apartamente e njësi shërbimi, me rreth 2.178 m2 sipërfaqe si dhe 28,690 m2 truall.
Policia thotë se regjistrimi penal për Balilin ka nisur zyrtarisht më 3 Prill 2016 për trafik droge, kur u bënë publike hetimet nga pala greke.
“Këto pasuri të sekuestruara do të administrohen dhe përdoren nga Agjencia e Administrimit të Pasurive të Sekuestruara dhe të Konfiskuara, pranë Ministrisë së Financave dhe Ekonomisë. Grupi ‘Balili’ është një nga grupet kryesore të skeduara nga Policia e Shtetit në kuadër të operacionit ‘Forca e Ligjit’, që ka për objekt edhe goditjen e pasurive apo aseteve me burim kriminal. E në këtë kuadër, hetimet po vijojnë me intensitet”, sqaron Policia e Shtetit në komunikatë.
Klement Balili aktualisht ndodhet në kërkim nga autoritetet e drejtësisë shqiptare, ndërsa ndaj tij është lëshuar një urdhër arresti nga organet e drejtësisë në Greqi.
Grupi ‘Balili’ është një nga grupet kryesore të skeduara nga Policia e Shtetit në kuadër të operacionit ‘Forca e Ligjit’, që ka për objekt edhe goditjen e pasurive apo aseteve me burim kriminal. E në këtë kuadër, hetimet po vijojnë me intensitet.
Policia e Shtetit fton këdo që disponon të dhëna apo informacione të vlefshme për identifikimin dhe zbulimin e pasurive apo aseteve të tjera në pronësi të personave të mësipërm apo lidhjeve të tyre të afërta, të telefonojnë në numrat falas 112 dhe 129, duke garantuar ruajtjen e anonimatit dhe goditjen e ashpër të elementëve anti-ligjore.
