Seanca e jashtëzakonshme e Kuvendit u zhvillua në mënyrë “paqësore” pas marrëveshjes së arritur midis kryeministrit Edi Rama dhe kryetarit të Partisë Demokratike Lulzim Basha.
Gjatë diskutimit për rendin e ditës, nuk munguan as batutat e kreut të Kuvendit Meta në drejtim të ish-kryeministrit Berisha.
Diskutimet në seancë:
Meta: Mendoj që nuk ka ndonjë arsye që as ta bëjmë pikë të parë dhe as pikë të fundit.
Bylykbashi: Kjo është një çështje e dakordësuar që kjo të jetë çështja e fundit për t’u votuar nga seanca. Mbasi të jenë ezauruar të gjitha çështjet e tjera, çështja e fundit që të votohet.
Meta: Me kë është dakordësuar?
Bylykbashi: Nuk besoj se ka ndonjë problem në aspektin procedural që ajo të jetë e fundit.
Ruçi: Unë e kuptoj që kjo ka qenë pjesë e negociatave politike ku nuk kemi qenë as unë as zt.Bylykbashi. Mendoj se vetë ngritja e problemi është një frymë mosbesimi. Në qoftë se do bëni këtë do të bëjmë këtë. Fryma e besimit është nga e para tek e fundit. Që pa e filluar shprehim mos besim tek rendi i ditës.
Meta: Zt.Berisha dha dakordësinë e tij. Të vazhdojnë tani (në sallë jehojnë të qeshura). Unë me atë e kam. Këta të tjerët e kanë me njëri-tjetrin. Kur të iki unë bëni çfarë të doni ju të tjerët.
Paloka: Çështja është e thjeshtë. Ka qenë çështje e marrëveshjes. Qëllimi nuk është as ai që ka frikë Gramozi, mosbesimi apo jo. Qëllimi është thjeshtë që Vettingu i famshëm të jetë akti i fundit i mbylljes së Parlamentit.
Meta: Vettingu nuk është as i pari dhe as i fundit, është në qendër të rendit të ditës.
