Presidenti i Parlamentit Europian, David Sassoli deklaroi në konferencën e përbashkët për media me kryeministrin Rama se është e rëndësishme të nisë çelja e negociatave me BE pasi kjo paraprin ndërmarrjen e reformave të tjera të cilat synojnë të përafrojnë standardet.
Ndërsa përshëndeti nismën “anti-KÇK” të qeverisë, Sassoli tha se ajo kishte dhe pak frymë italiane duke patur parasysh standardet por ai theksoi se e rëndësishme është çelja e negociatave.
LEXO EDHE- Sassoli: Do të nxisim votën në favor për Tiranën dhe Shkupin
“Duhet t’i falënderojmë shqiptarët pasi e kuptojmë zhgënjimin por e shohim se ata vijojnë të shohin drejt Europës. Kjo është vetëm një vonesë por që po mbushet nga nisma të mëdha të qeverisë. Lufta kundër krimit të organizuar. Ne e dimë që pozicioni I disa qeverive ishte të rishikohej procesi i anëtarësimit dhe në ditët në vijim do të kemi disa propozime në lidhje me metodologjinë. Ne jemi të bindur që paketa duhet të ecë njëkohësisht si për Shqipërinë dhe Maqedoninë e veriut. Pse është e rëndësishme reforma e qeverisë? Është sepse shumë aspekte kanë të bëjnë me luftën kundër krimit të organizuar. Kjo do të rrisë kapacitetet e Shqipërisë. Kjo reformë ka dhe pak frymë italiane. Masa që është marrë për rikuperimin e pasurive të paligjshme është pika e fortë që jam I bindur se do të ketë rezultate. Duhet të hapim procesin e integrimit që do të thotë se më pas do të vijojmë të ndërmarrim reforma për të përshtatur standardet me BE”, tha Sassoli.
Presidenti i Parlamentit David Sassoli nisi sot një vizitë dy ditore në Shqipëri, për të dhënë një sinjal mbështetje ndaj vendit në rrugën e tij të integrimit europian. Në orën 15:00 ai pritet të mbajë një fjalim në seancën plenare të Kuvendit. /Opinion.al
