Për herë të parë, si kurrë më parë, qyteti bregdetar, ai që zakonisht jemi mësuar ta shohim të zhurmojë gjatë gjithë sezonit veror, ka marrë këtë dimër dritën dhe ngjyrat e ngrohta të festave të fundvitit.
Saranda është bërë gati tashmë për të pritur edhe në dhjetor miq e turistë nga të gjitha qytetet e Shqipërisë e të botës.
Festimet u hapën zyrtarisht dje, me ceremoninë e ndezjes së dritave të pemës së Krishtlindjes, ku mes fëmijëve e qytetarëve ishte i pranishëm dhe kryetari i bashkisë së Sarandës, Oltion Çaçi, i cili ka iniciuar gjithçka po ndodh këtë fundvit në Sarandë. Të gjithë bashkë, në një atmosferë muzike e gëzimi, shënuan fillimin e një dhjetori ndryshe në qytetin e tyre, e një tradite të bukur: që Saranda të zgjidhet si destinacioni magjik i festave.
Pedonalja ka marrë jetë jo vetëm nga dritat por dhe nga shtëpizat e “fshatit të Krishtlindjes”, ku do të ofrohet gjithçka njerëzit duan të shijojnë gjatë festave. Aty janë vendosur edhe lojrat argëtuese për fëmijët e do të zhvillohen një sërë aktivitetesh, nga më të larmishmet, me fëmijët e artistët e qytetit, por edhe me të ftuarit big, të suksesshëm në tregun muzikor.
Saranda e bëri ftesën e saj. Tani është radha jonë që ta zgjedhim si destinacionin e ri të festave, si një eksperiencë ndryshe, ku viti i ri do të na vijë nga deti.
