Ka vetëm katër ditë që ka nisur Viti i Ri, por nuk ka qenë edhe aq i mbarë për disa çifte të njohur të showbiz-it. Lajmet se, të paktën dy prej tyre, i kanë dhënë fund historisë së dashurisë janë përhapur me shpejtësi në mediat ndërkombëtare dhe, nga sa duket, gjasat janë që gjithçka të jetë e vërtetë.
Sa më shumë duam që t’i shohim bashkë çiftet e famshme, aq më shumë punët sa vijnë e vështirësohen për ta. Në një kohë kur ne shpresonim që 2019-a kishte nisur mirë për të gjithë duke ia lënë të këqijat 2018-ës, disa çifte, për fat të keq i kanë dhënë fund raportit të tyre. Duke nisur me Zayn Malik dhe Gigi Hadid e për të shkuar te Birdman dhe Toni Braxton, cili prej tyre ka vendosur për t’i dhënë fund romancës në fillim të këtij viti?
Birdman dhe Toni Braxton
Pothuaj një vit pasi publikuan fejesën, themelusi i “Cash Money Records”, Birdman, dhe këngëtarja Toni Braxton i kanë dhënë fund në fillim të 2019-ës. Më 2 janar ata të dy postuan mesazhe thumbuese në adresë të njëri-tjetrit, në profilet respektive të Instagramit. Ishte Birdman ai që në fillim postoi dhe e fshiu mesazhin në story “It’s over.” (Ka marrë fund). Më pas, fshiu edhe të gjitha fotot me Toni-n në faqen e tij. Në të njëjtën ditë, Toni pastroi nga faqja e saj të gjitha fotot dhe postoi një foto të vetme me mbishkrimin: “Të nisësh një kapitull të ri nuk është gjithmonë një zgjedhje e lehtë. . . por GJITHMONË zgjedhjet duhen bërë. Gëzuar Vitin e Ri.”
Zayn Malik dhe Gigi Hadid
Çifti janë bashkë që nga nëntori i 2015-ës. Pasi u mësua ndarja e parë në mars 2018, ata u kthyen sërish bashkë disa muaj më vonë — por duket se ndarja ishte sërish në rrugën e tyre. Më 2 janar, Us Weekly konfirmoi se këngëtari dhe modelja “u përpoqën ta mbajnë në jetë lidhjen e tyre” dhe Gigi “i kishte fokusuar të gjitha energjitë gjatë gjithë kohës tek ai [Zayn], por nuk ishte e thënë të shkonte siç duhej.”
