Kryeministrja finlandeze në largim Sanna Marin është divorcuar nga bashkëshorti i saj Markus Raikkonen.
Me një foto ku kanë dalë së bashku duke buzëqeshur dhe me të njëjtin mbishkrim për të dy çifti njoftoi ndarjen në rrjetin social Instagram.
“Kemi kërkuar divorcin me marrëveshje të përbashkët. Jemi mirënjohës për 19 vitet e kaluara së bashku dhe për vajzën tonë të dashur. Ne do të mbetemi miqtë më të mirë dhe prindër të dashur. Ne do të kalojmë kohë si familje për të mirën e vajzës. Ne dëshirojmë të respektoni privatësinë tonë. Nuk duam të komentojmë më shumë”.
Çifti u martua në vitin 2020, në kulmin e pandemisë dhe kanë një vajzë pesëvjeçare. 37-vjeçarja Marin, u bë kryeministrja më e re në botë në vitin 2019 në moshën 33-vjeçare, duke udhëhequr një koalicion të qendrës së majtë me pesë lidere partiake femra, katër prej të cilave janë nën 35 vjeç.
Nën mandatin e saj, Sanna Marin udhëhoqi Finlandën drejt anëtarësimit historik në NATO, por kjo nuk ishte e mjaftueshme për ta rizgjedhur atë.
Kujtojmë se 37-vjeçarja u përfshi në një sërë skandalesh gjatë vitit të kaluar. Në gusht, Sanna Marin u filmua teksa kërcente në një lokal nate me këngëtarin finlandez, Olavi Uusivirta. Në atë kohë, u fol se ata kishin një lidhje, por këto pretendime u hodhën poshtë nga kryeministrja në mënyrë kategorike. Ajo tha se ata ishin vetëm miq të mirë. Megjithatë, është e paqartë nëse ky detaj ka ndikuar në marrëdhënien e saj në çift.
