Kryeministrja e Finlandës, Sanna Marin ka humbur zgjedhjet, pasi u mund nga rivalët e saj konservatorë dhe të djathtë.
Udhëheqësi konservator finlandez Petteri Orpo ka fituar një garë zgjedhore trepalëshe, duke mundur qendrën e majtë të kryeministres Sanna Marin.
Orpo siguroi 20.8% të votave, përpara partisë të krahut të djathtë finlandez dhe qendrës së majtë.
Nga mediat e huaja mësohet se për zonjën Marin, rezultati është një humbje e hidhur, edhe pse ajo rriti vendet e partisë së saj dhe siguroi 19.9% të votave.
Edhe pse pa një fitore ajo vazhdon të gëzojë vlerësime të larta në sondazhe dhe është vlerësuar gjerësisht për drejtimin e Finlandës drejt hyrjes së menjëhershme në NATO dhe përballimin e pandemisë Covid-19 në vendin e saj.
Menjëherë pasi lideri konservator shpalli fitoren, Sanna Marin ka pranuar rezultatin e zgjedhjeve, duke dhënë urimet e saj.
“Urime fituesi i zgjedhjeve, urime Partisë së Koalicionit Kombëtar, urime Partisë Finlandeze. Demokracia ka folur,” u tha ajo mbështetësve.
Për javë të tëra, të tre partitë kishin qenë pothuajse të barabarta në sondazhe, vështirë për tu dalluar nga rezultatet e njëra-tjetrës.
Finlandezët nënvizuan suksesin e tyre duke fituar më shumë rajone se çdo parti tjetër në Finlandën kontinentale. Ndërkohë, tre nga partitë e tjera në koalicionin në largim – Partia e Qendrës, Aleanca e Majtë dhe të Gjelbërit , patën humbje të mëdha.
Tani 37 vjeç, Sanna Marin u bë liderja më e re në botë kur shpërtheu në skenën politike në vitin 2019. Ajo drejtoi një koalicion prej pesë partish, të gjitha të udhëhequra nga gra.
Konservatorët do të kenë mundësinë e parë për të formuar një qeveri dhe nëse ia dalin, zoti Orpo, 53 vjeç, do të bëhet kryeministri i ardhshëm.
Nën një qeveri të udhëhequr nga Orpo, Evropa mund të presë një konservator pro-evropian nga qendra liberale e partisë së tij me një theks në politikën ekonomike./Opinion.al
