Presidenti serb, Aleksandër Vuçiç, ka reaguar pasi Shtetet e Bashkuara të Amerikës vendosën sanksione kundër drejtorit të Agjencisë së Sigurisë dhe Informacionit (BIA), Aleksandër Vulin.
Vuçiç tha se “është jashtëzakonisht e rëndësishme të kryhet një hetim” ndaj bashkëpunëtorit të tij, Vulin.
“Unë nuk e vura re që kokaina u gjet në zyrën e Vulinit, por në Shtëpinë e Bardhë. Por mendoj se është jashtëzakonisht e rëndësishme të kryhet një hetim”, tha Vuçiç, në reagimin e tij të parë pasi SHBA vendosi sanksione ndaj Vulinit.
Një ditë më parë Zyra për Kontrollin e Aseteve të Huaja në Departamentin amerikan të Thesarit tha se Vulini është përfshirë në afera korruptive për “të shtyrë përpara agjendat e tij politike dhe interesat e tij personale në kurriz të paqes dhe stabilitetit në Ballkanin Perëndimor”.
“Ndaj Vulin nuk janë vendosur sanksione për ndonjë krim, korrupsion, asgjë; ndaj tij janë vendosur sanksione për shkak të qëndrimit të tij ndaj Federatës Ruse”, tha Vuçiç.
Sakaq, pasi SHBA sanksionoi Vulin një pjesë e opozitës në Serbi kërkoi shkarkimin e tij./Opinion.al
