Prej disa ditësh në mediat italiane ka qarkulluar lajmi se klubi italian i Sampdorias interesohet për mbrojtësin shqiptar të Këlnit, Mërgim Mavraj. Megjithatë, ditën e sotme portali “ilsecoloxix.it” ka zbuluar më shumë detaje mbi një transferim të mundshëm të Mavrajt në Serinë A.
Sipas këtij portali, Mavraj është vetëm opsion i tretë për Sampdorian në merkato. Italinët janë vënë në kërkim të një qendërmbrojtësi, por para se të tentojnë afrimin e Mavrajt, dëshirat e tyre janë Bianketi i Veronës ose Romanjoli i Karpit.
Vetëm në rast se nuk arrihet marrëveshje me një nga këta dy futbollistë, atëherë do të tentohet një goditje e minutës së fundit me Mavrajn.
Gjithsesi, edhe nëqoftëse Sampdoria do të vendosë të bëjë ofertë zyrtare për Mavrajn, nuk është e sigurt që mbrojtësi dhe Këlni do ta pranojnë, pasi në një intervistë të para disa ditëve për “BILD”, shqiptari u shpreh se ishte gati për të rinovuar kontratën me klubin gjerman, duke qënë se ndihej mjaft i vlerësuar.
