Kryetarja e Kuvendit, Elisa Spiropali po merr pjesë ditën e sotme në Samitin “Ukrainë–Europa Juglindore”.
Në fjalën e saj, Spiropali përcolli një mesazh solidariteti dhe mbështetjeje për shtetin e Ukrainës. Po ashtu, Spiropali theksoi se Shqipëria qëndron pa kushte në krah të Ukrainës, në mbrojtje të lirisë, sovranitetit dhe aspiratave evropiane të saj.
“Ne kemi mbështetur Ukrainën përmes ndihmës humanitare, miratimit të sanksioneve dhe avokimit të zëshëm për rrugëtimin e saj evropian. Ne besojmë se Ukraina i përket Bashkimit Evropian dhe do të vazhdojmë të jemi një zë i fuqishëm për integrimin e saj”, u shpreh Spiropali.
Ajo theksoi se kjo nuk është thjesht një deklaratë, por një premtim afatgjatë për mbështetje konkrete:
“Shqipëria qëndron përkrah Ukrainës, sot, nesër dhe për aq kohë sa do të jetë e nevojshme. Lufta juaj është edhe lufta jonë, shpresa juaj është edhe shpresa jonë, e ardhmja juaj është e ardhmja jonë e përbashkët.”
Në përfundim, Kryetarja e Kuvendit shprehu dëshirën dhe urimin që paqja, drejtësia dhe liria të kthehen sa më shpejt në Ukrainë, duke rikonfirmuar pozicionin e Shqipërisë si një vend aktiv dhe i përgjegjshëm në përkrahje të vlerave evropiane dhe rendit ndërkombëtar.
