Samiti i Komunitetit Politik Europian i cili po zhvillohet ditëm e sotme në Tiranë është ndjekur me mjaft interes edhe nga mediat ndërkombëtare, të cilat disa prej tyre janë prezente edhe në sheshin Skënderbej.
Associated Press i ka kushtuar vëmendje samitit që ka mbledhur liderët europianë dhe krerët e institucioneve europiane.
Në këtë artikull, AP shkruan se Shqipëria po pret një samit të madh disa ditë pas zgjedhjeve, të cilat u fituan nga Partia Socialiste qeverisëse e Ramës.
Kryeministri tha se samiti është një pikë krenarie për Shqipërinë dhe një “frymëzim dhe motivim për të vazhduar më tej”.
AP ka përshkruar të gjithë procesin e mbërritjes së udhëheqësve në sheshin Skënderbej të Tiranës, në një mëngjes me shi dhe me një performancë të shkurtër nga kërcimtarë me kostume popullore përpara se të shkonin në sallën e përkohshme të konferencave, e ngritur në këmbët e një monumenti të heroit kombëtar të Shqipërisë Gjergj Kastrioti Skënderbeu.
Më tej paraqiten mesazhet e liderëve evropianë, të cilët kryesisht janë folur për paqen që duhet të arrihet mes Ukrainës dhe Rusisë:
“Unë mendoj se Putini bëri një gabim duke dërguar një delegacion të nivelit të ulët,” tha Sekretari i Përgjithshëm i NATO-s Mark Rutte.
“Topi është qartë në fushën e tij. Ai duhet të jetë serioz për të dëshiruar paqen. Kështu që unë mendoj se i gjithë presioni tani është mbi Putinin,” shtoi Rutte.
Zelenskyy nuk bëri asnjë koment teksa mbërriti në samit, duke ecur me kryeministrin shqiptar Edi Rama përgjatë tapetit të kuq, duke kaluar mediat e mbledhura.
Shefja e Jashtme e Bashkimit Evropian Kaja Kallas tha se Putini “po luan lojëra, gjë që tregon se ata nuk janë seriozë për paqen”.
Presidentja e Komisionit Evropian Ursula von der Leyen tha se ishte e qartë se “Presidenti Zelenskyy ishte gati për t’u takuar, por presidenti Putin nuk u shfaq kurrë, dhe kjo tregon besimin e tij të vërtetë. Kështu që ne do të rrisim presionin”.
Von der Leyen tha se BE po përgatit një paketë të re sanksionesh.
Sektori financiar i Rusisë gjithashtu do të jetë në shënjestër, tha ajo. Të dërguarit e BE-së kanë punuar për paketën e re të sanksioneve për disa javë dhe ministrat e jashtëm të bllokut mund t’i miratojnë ato sa më shpejt të martën.
Kryeministri italian Giorgia Meloni theksoi se përpjekjet për të arritur një marrëveshje për Ukrainën duhet të vazhdojnë.
“Refuzimi i ofertës për bisedime të drejtpërdrejta me Zelenskyy është dëshmi e qartë se Putini nuk dëshiron seriozisht paqen. Ai është duke zvarritur takat e tij,” tha kryeministri i Mbretërisë së Bashkuar Keir Starmer.
”Dhe kjo është arsyeja pse sot është një mundësi vërtet e rëndësishme, për të punuar me kolegët për t’u siguruar që jemi absolutisht të bashkuar”, u shprehën liderët evropianë.
Mbledhja e liderëve nga rreth 50 vende dhe organizata do të trajtojë gjithashtu mënyra për të përmirësuar konkurrencën e kontinentit dhe për të trajtuar migrimin e paautorizuar.
Kujtojmë se Samiti inaugurues i vitit 2022 përfshiu 27 vendet anëtare të BE-së, partnerë aspirantë në Ballkan dhe Evropën Lindore, si dhe fqinjë si Britania e Madhe – i vetmi vend që është larguar nga BE-ja – dhe Turqia.
Rusia është e vetmja fuqi e madhe evropiane që nuk është ftuar, së bashku me Bjellorusinë, fqinjin dhe përkrahësin e saj në luftën me Ukrainën.
