Kryeministri Edi Rama, kancelari gjerman, Olaf Scholz dhe Presidentja e Komisionit Evropian, Ursula Von der Leyen kanë mbajtur një konferencë të përbashkët për mediat.
Gjatë fjalës së saj, Presidentja e KE tha se liderët janë mbledhur në Tiranë, për të punuar në mënyrë që Ballkani Perëndimor dhe Bashkimi Europian të jenë më afër, por theksoi se sytë e gjithë botës, janë në Izrael dhe Palestinë, për shkak të luftës që po zhvillohet atje.
Von der Leyen shtoi se Izraeli ka të drejtë të mbrohet sipas ligjeve ndërkombëtare dhe se civilët palestinezë nuk kanë pse të paguajnë çmimin për aktet terroriste të Hamasit.
“Ne jemi këtu në Tiranë, duke punuar për t’i sjellë më afër Ballkanin Perëndimor dhe Bashkimin Europian më afër, por në të njëjtën kohë, e gjithë bota i ka sytë të lufta Izrael-Palestinë. Në mendjet tona, nuk ka justifikime për Hamasin për sulmet terroriste, për aktet e terrorit. Izraeli ka të drejtë të mbrojë veten sipas ligjeve ndërkombëtare dhe tani, palestinezët në Gaza kanë nevojë për ndihmë humanitare. Ata nuk kanë pse të paguajnë çmimin për barbarzimin e Hamasit. Kjo është arsyeja se përse Komisioni ka vendosur që të trefishojë ndihmat për Gazat, në 75 milionë euro”, – tha Ursula Von der Leyen.
