Sekretari i Çështjeve të Jashtme britanik James Cleverly ka folur për Samitin e Procesit të Berlinit të mbajtur në Tiranë gjatë një interviste për emisionin “Opinion”.
Cleverly tha se gjatë samitit kanë folur lidhur me integrimin e Ballkanit Perëndimor në BE si dhe për ruajtjen e stabilitetit në rajon.
Teksa u ndal tyte procesi i integrimit, sekretari i Çeshtjeve të Jashtme, tha se Shqipëria ka bërë progres dhe se për të vijuar më tej do të ketë edhe mbështetjen e Britanisë.
Pjesë nga intervista
Fevziu – Mund t’ju pyes për samitin e Berlinit? Si ishte samiti? Cili ishte diskutimi më i rëndësishëm që keni pasur gjatë samitit?
Cleverly – Ishin një sërë gjërash. Diskutuam për vendet e Ballkanit Perëndimor dhe integrimin e tyre më të madh në komunitetin evropian, pulsin e Bashkimit Evropian, por edhe të familjes evropiane, për t’u siguruar për ruajtjen e paqes dhe, fatkeqësisht, kjo është një pjesë e botës ku kemi parë konflikt kohët e fundit, kështu që po punojmë për vendosjen e paqes, por edhe për zhvillimin ekonomik. Pra, pati shumë gjëra pozitive në takim, dhe mendoj se u zhvillua në një klimë kryesisht të mirë.
Fevziu– Kam qenë 22 vjeç kur filluam të flisnim për integrimin në BE, tani jam 54 vjeç dhe nuk jam i sigurt nëse do të jem në jetë derisa të bëhemi anëtarë me të drejta të plota të Bashkimit Evropian. A mendoni se jemi pak me vonesë?
Cleverly – Kjo ishte një nga temat e bisedës, folëm rreth asaj se sa kohë i duhet një vendi që të anëtarësohet në Bashkimin Evropian, gjithë jeta e njeriut që nga rinia …. Një nga gjërat që më bëri shumë përshtypje ishte… kryeministri Edi Rama shfaqi një video në fillim të takimit, ku tregohej transformimi i Shqipërisë nga vitet ‘60, ‘70, ‘80 dhe kjo më la mbresë të thellë, se ky është një vend me ambicie domethënëse, me energji të vërtetë, dhe një vend që mund të vendosë të bëjë gjëra të mahnitshme. Tani, Britania e Madhe nuk është më anëtare e Bashkimit Evropian, kështu që do të ishte gabim që unë të komentoja shpejtësinë e procesit, por nga këndvështrimi i Mbretërisë së Bashkuar, ne jemi shumë të prirur për të zhvilluar një marrëdhënie më të fortë me Shqipërinë. Marrëdhënia është në nivelin e duhur, por mundësitë janë për ta bërë edhe më të mirë.
