Kryeministri Edi Rama ka dalë sot në një konferencë për mediat, ku është ndalur te samiti i djeshëm që u mbajt në Bruksel, mes përfaqësuesve të BE dhe Ballkanit Perëndimor.
Kreu i qeverisë tha se vendet anëtare kanë një vlerësim shumë pozitiv për progresin e Shqipërisë ndërsa shtoi se posaçërisht nga BE vlerësohet me nota pozitive performanca e skuadrës tonë kombëtare për negociatat.
“U diskutuan perspektivat tona për në BE. U fol për procesin e normalizimit mes Serbisë dhe Kosovës, për nevojën e linjëzimit të Ballkanit Perëndimor dhe BE. Më vjen mirë që të ndaj sot me ju faktin se vendet anëtare kanë një vlerësim shumë pozitiv për progresin e Shqipërisë. Posaçërisht nga BE vlerësohet me nota pozitive performanca e skuadrës tonë kombëtare për negociatat për përmbushjen e skanimit të procedurave dhe tregjeve tona. Këto ditë do të organizoj dhe një takim falënderimi për anëtarët e kësaj skuadre.”, tha Rama.
Sipas Ramës, Ballkani Perëndimor është dëgjuar dhe ka fituar respekt si kurrë më parë në Bashkimin Evropian.
“Ballkani Perëndimor është dëgjuar, kemi filluar një respekt që nuk e kemi pasur kurrë dhe është bërë pjesë e pandashme e punës së Brukselit dhe ma ha mendje, ndoshta të dy presidentët aktualë e kanë vizituar Shqipërinë dhe rajonin më shumë se të gjithë paraardhësit tyre të marrë së bashku”, – tha ai.
