Zëvendëskryeministri i Italisë, Matteo Salvini, i ka kërkuar shtëpisë së operas “La Scala” në Milano, të refuzojë oferta nga Arabia Saudite, për të investuar fonde në teatër. Ai ka argumentuar se një nga institucionet kulturore më prestigjioze të Italisë, duhet të shmangë paratë nga Arabia Saudite, një vend mysliman, thellësisht konservator, i akuzuar për abuzime të përsëritura të të drejtave të njeriut, e kryesisht të grave.
Ministria e Kulturës Saudite ka ofruar një marrëveshje partneriteti pesëvjeçar me La Scalan, me vlerë 15 milionë euro, por Salvini u tha gazetarëve se ai nuk dëshiron që propozimi të pranohet.
“Unë do të preferoja që disa njerëz të mos jenë atje dhe që La Scala të jetë e lirë, e pavarur dhe autonome. Nëse zviceranët duan të investojnë në La Scala, nuk do të kemi një problem”, tha ai.
Salvini, kryeson partinë e djathtë ekstreme, Lega Nord, ka sulmuar Arabinë Saudite për herë të dytë gjatë këtij viti. Kujtojmë se në janar ai i cilësoi si të neveritshme kufizimet e vendosura për gratë që shpresonin të shihnin finalen e Superkupës italiane, e cila u zhvillua në fillim të vitit në Arabinë Saudite.
Ndërkaq bordi drejtues i La Scalas do të diskutojë propozimin saudit në një takim më 18 mars, por media italiane deklaron se ka shumë mundësi që propozimi të refuzohet. /Opinion.al
