Ish-zëvendës Kryeministri dhe ish-ministri i Brendshëm italian, Matteo Salvini ka moderuar qëdrimin e tij ndaj Shqipërisë.
Megjithëse në fillimet e partisë së tij, Lega Nord, ai mbante qëndrime radikale ndaj emigrantëve tashmë Salvini duket se ka ndryshuar retorikë ndaj shqiptarëve.
Ai ishte ndër të parët që përshëndeti nisjen e stafit të personelit mjekësor nga Shqipëria, e cila u vendos në ndihmë të situatës kaotike të krijuar në spitalet në Itali, për shkak të COVID-19.
“Telefonova personalisht kryeministrin shqiptar Edi Rama për ta falënderuar si italian, atë dhe popullin shqiptar që dërguan 30 mjekë. Nga Europa nuk arrin asgjë, nga Gjermania, Holanda, Brukseli nuk vjen asgjë, nga Shqipëria e afërt vijnë 30 mjekë, dhe unë e falënderoj me zemër”- tha Salvini kur u nis ekipi shqiptar i mjekëve në Itali.
Këtë javë ai ka qenë në Lampeduza ku ka vizituar edhe portin e kësaj zone e cila njihet për mbërritjen e anijeve klandestine por edhe ato të trafikut të lëndëve narkotike.
Para nisjes ai ka postuar një foto nga shtëpia e tij me një kapele të rojes kufitare detare italiane. Por ajo që ra në sy ishte se në sfond Salvini nuk kishte harruar të tregonte një qeleshe me shqiponjën me dy koka cila lexonte “Albania”.
Ngjitur me qeleshen, qëndronte dhe një foto e tij me vajzën.
“Mirëmëngjesi miq. Sot do të jem në Lampeduza. Italia duhet dhe mbrohet, kufijtë ruhen”, ka shkruar kreu i partisë së ekstremit të djathtë Lega Nord. /Opinion.al
