Mjeku Kita Sallabanda u shpreh optimist për mënyrën se si po menaxhohet situata ndaj Covid -19, ndonëse tha se qytetarët duhet të ruajnë mjetet e izolimit sepse janë e vetmja armë që kemi në dorë për ta luftuar sëmundjen, derisa të ketë disa trajtime kundër saj. “Unë mendoj që për 3 – 4 javë do të kemi trajtimet derisa të bëhet vaksina që do më shumë kohë”, tha mjeku në një lidhje në Opinion.
Fevziu: A ndihen qytetarët më të relaksuar në raport me rrezikun 3-4 javë më parë?
Sallbanda: Ndihen më të relaksuar, megjithatë kemi filluar masat e çlirimit në mënyrë graduale. Po dalin fëmijët, do dalin moshat e mëdha, do hapen lokalet, por shkollat nuk do t’i hapim. Dolën fëmijët, ditën e dielë në datën 2 Maj do lejohet të dalin moshat e tjera për të bërë pak fizkulturë, pranë shtëpisë. Nuk mund të largohen më shumë se 1.5 km nga shtëpia.
Ndërsa foli për përdorimin e mjeteve mbrojtëse si maskat, mjeku tha: “Neve duhet të jetojmë për një kohë shumë të gjatë me maska. Mjetet e izolimit duhet t’i ruajmë sepse është e vetmja armë që kemi në dorë për ta luftuar sëmundjen, derisa te kemi trajtimet. Unë mendoj që për 3 – 4 javë do të kemi trajtimet, derisa të bëhet vaksina që do më shumë kohë”.
I pyetur nga gazetari Blendi Fevziu, lidhur me momentin kur ne mund të themi se kemi dalë nga kjo situatë, Sallbanda tha: “Është shumë interesante të shohim ç’do të ndodhë në vjeshtë. Nëse në vjeshtë apo në fillim të dimrit, nuk do kemi rikthim mund të themi që situata është më e favorshme, do mendojmë që kemi dalë nga kjo situate”./Opinion.al
